”Kodima”-lehtez om ”SMIrotvorec” -konkursan Öbokan federaližen okrugan vägestajiden lugetišes
Arhangel’skas nimitadihe ”SMIrotvorec” -konkursan Öbokan federaližen okrugan vägestajad. Karjalan lehtmehed putuiba niiden lugetišhe. Pauklahjoičend mäni Arhangel’skas Valdišton sauvotuses.
Konkursan ekspertad kacuiba läz 900 kirjutest 142 Venäman Öbokan federaližen okrugan joukvestištospäi. Öbokan okrugan lühüdaha lugetišhe putui 33 parahint joukvestištod mugoižiš nominacijoiš: ”Painuzjoukvestišt”, ”Telenägudez”, ”Lapsiden da noriden joukvestišt”, ”Internet” i ”Opendajad da verod”.
Konkursan Öbokan federaližen okrugan etapan vägestajikš tuli 15 lehtmez’kollektivad Venäman Öbokan erazvuiččiš agjoišpäi, niiden keskes Karjalan Valdkund-ki. ”Kodima”-lehtez sai koumanden sijan ”Painuzjoukvestišt”-nominacijas. Täl vodel “Kodima”-lehteselpäi ”SMIrotvorec”-konkursale oli oigetud kaks’ kirjutest: Natalja Bukovskajan “Enarne ma” möst kerazi sebranikoid” da Irina Sotnikovan “Hän kandab armastust kodikel’he voziš päliči” (molembad kirjutesed oli paindud lehtesen heinkun nomeras). ”Telenägudez”-nominacijas toine sija anttihe ”Respublika Karelia”-tedoazjmehištole Petroskoišpäi, da se mugažo tegihe parahimaks ”Opendajad da verod” -nominacijas.
— Kaik ezitadud kirjutesed oma erazvuiččed da ičeladuižed, no niid ühtenzoitab lehtmehiden todesine melentartuz’ kirjutadud toziazjoihe, a mugažo neniden kirjutesiden da reportažiden hengihe, jonošti konkursan sädandkomitetan ohjandai Margarita L’ange.
Öbokan federaližen okrugan etapan vägestajad putuiba federaližen konkursan lühüdaha lugetišhe. Tehtas ühthevedod da nimitadas laureatad Moskvas 28. kül’mkud.
Enamba konkursan Öbokan federaližen okrugan etapan laureatoiš voib tedištada täga.
Uzištoid neciš temas voib lugeda mugažo venäks.
