Kodikeliden specialistoiden vaumičendan küzund jäb aktualižeks
Petroskoiš mäni Karjalaižiden, vepsläižiden da suomalaižiden ezitajiden nevondišt Karjalan pämehen ohjandusel. Ištundan ühtnikad pagižiba küzundoiš, miččed koskiba valdkundan tuged maorganizacijoile Karjalan erazvuiččiš rajonoiš, valdkundan igähižiden rahvahiden kul’turan kaičendas da kehitoitandas, kul’turan organizacijoiden rados da niiden tuges, mugažo mahtokahiden tundijoiden vaumičendas kelen da kul’turan alovehes.
Baltianmeren-suomaližiden filologijan kafedran rados starinoiči Petroskoin universitetan prorektor Konstantin Tarasov.
— Tämbei kafedral karjalan, vepsän da suomen kelid opendab 113 üläopenikad. Kafedran pästnikad nene oma tulebad opendajad, kändajad, žurnalistad, kul’turan da turizman radnikad, sanub Konstantin Gennadjevič.
Tämbeižeks päiväks kodikeliden specialistoiden vaumičendan problem om aktualine. Pidab vaumita kodikeliden opendajid i sen täht valdkundan tugi om sur’: makstas ližastipendii, om oigenduzsijoid. No opendamha kodikelid universitetha paksus tuleba nored toižiš agjoišpäi i lidnoišpäi, hö ei olgoi vepsläižed da karjalaižed, sikš opendusen jäl’ghe hö ei jägoi meiden külihe opendamha školiš kodikelid.
— Meiden Petroskoin valdkundan üläopišt om üksjäine mas, kus vaumitas mugoižid specialistoid, kudambad tetes kodikel’t voiba rata opendusen, kul’turan, tedon alovehiš, joukvestištos. Nece om sur’ sabustuz! Mugošt tošt mahtištod ei ole, homaiči Zinaida Strogalščikova.
Tehtes ühthevedoid, ištundan ühtnikad pätiba, miše pidab aktivižesti kucta üläopenikoid Baltianmeren-suomaližiden filologijan kafedrale, paksumba tehta vastusid školiš, pagišta vanhembiden klassoiden openikoidenke i starinoita heile voimuses löuta radod karjalan, vepsän da suomen keliden alovehiš.
