Koštamukšelaiset tulovaisuon kuvat piäštih voittajiksi
Koštamukšelaiset Nadežda Savina ta Tatjana Vasiljeva piäštih voittajiksi yleisvenäläiseššä Tulovaisuon kuvat -tevollisušsuveniirikilpailušša. Heijän luatima Matkuštamini Karjalua myöten -stolapeli piäsi enšimmäisellä paikalla Kuavan ulkopuolella -nominatijošša, a Tatjana Vasiljevan valmistamat tevollisuškauppatavarat šuatih pronšši Uuvven tevollisušsuveniirin ideja -nominatijošša.
— Voitto šiinä prestiišikilpailušša ei ainuoštah ole meijän šuavutuš, vain mahollisuš vaštuavašti etuštua Karjalua ta näyttäy, jotta meijän aloveh on tevollisen, luovan ta innovatiivisen ajatukšen keškuš, šano Nadežda Savina 64. parallel'-lehellä.
Palkičennan seremonija ta töijen loppunäyttely vietettih 1. pimiekuuta Čerepovetsissa.
Nadežda Savina ta Tatjana Vasiljeva luajittih Rautaset kaupunkit-, Vetehisen kopeikat- ta Matkuštamini Karjalua myöten -stolapelit, kumpaset tuttavuššutetah kaupunkien nähtävykših ta metallitevollisušammattloih šekä Čerepovets-, Koštamuš- ta Olenegorsk -kaupunkien kauppatavarat. Niissä kaupunkiloissa toimiu Severstal’-yrityš.
Tulovaisuon kuvat -kilpailuo toteuttau Pohjosen hyvyš -hyvänluajintašiätijö yheistyöššä Sosialitietotoimiston kera Severstal’-yritykšen kannatukšella Alovehien luova työ -granttikilpailun rajoissa.
Yhty Oman Median Telegram-kanalah!
