Koštamukšešša on piättyn Kontokkijärven rantakavun kunnoššušvaihe
Koštamukšešša on piättyn Kontokkijärven rantakavun kunnoššušvaihe. Koštamukšelaisilla rantakatu on šuosittu lepopaikka. Alovehta kunnoššetah vaiheittain käyttyän Infrastruktuuri elämyä varoin -kanšallisprojektin mahollisukšie. Šiitä kertou Karjalan tašavallan rakentamisen, elinkunnallistalouven ta energetiikan ministerijö.
Kunnoššuštyö alko kešällä 2025. Urakoiččija luati uušie valotettuja kävelypolkuja ta ašetti skammija näin, jotta voipi käččuo järveh. Šamoin ranta-alovehella on terrassi tilaisukšie varoin, uuvvet portahat ta näyttämö, mistä avautuu näköala järvellä.
— Tulovaisuošša šuunnittelemma ašettua rantaviivalla laiturin ta muutoman näköalapaikkan järvellä päin — yksi ašetetah amfiteatterin viereh ta nellä – meččäalovehella. Šamoin šuunnitelmissa on ašettua pienie arhitektuurimuotoja šekä issuttua puita ta penšahie, lainuau ministerijö Koštamukšen hallinnon rakennuš- ta korjaušošašton piäspesialistin Viktorija Mel’nikovan šanoja.
Vuotena 2021 Kontokkijärven rantakavun kunnoššušprojekti piäsi Venäjän Mukava kaupunkiympäristö -kilpailun voittajien lukuh. Vuotena 2024 projekti uuvveštah voitti Mukava kaupunkiympäristö -kilpailušša ta šai yli 90 miljonie rupl’ua toteuttamiseh vuosina 2025—2026.
Yhty Oman Median Telegram-kanalah!
