Koštamuš šuau skeittipuiston
Koštamukšešša alettih rakentua nykyaikaista skeittipuistuo. Töitä šuorittau Legato Construction-yhtijö. Ehotuš tuli Koštamukšen nuorisolta. Idejan kannatti Karjalan halličukšen varapiäministeri, Koštamukšen piirin kurattori Larisa Podsadnik. Asiešta kertou Koštamukšen uutiset -lehti.
— Oikein himottau, jotta Koštamukšen nuorisolla ilmeštyis oma vetovoimapisteh. Koroššan, jotta tämä on vain enšimmäini vaihe. Aloveh antau täyttyä tilua uušilla rakentehilla ta kehittyä šitä. Olen varma, jotta skeittipuistošta tulou šuosittu paikka. Enšiksi šentäh kun še on nuorien aloteh, a toisekši mie niän, jotta šemmoni tila on šuosittu Petroskoissa. Tila šopiu urheilulla šekä nuorison aktiivisella ta hyövyllisellä joutoajalla, lainuau painoš Larisa Podsadnikin šanoja.
Varapiäministeri autto šopie hyvänluatujien kera projektin rahotukšešta ta kiinittyä Legato Construction-yhtijön huomijuo.
Rakentajat šuunnitellah lopettua työt šyyškuun alušša. Vaikka objekti avautuu vähän myöhemmin, tänä kautena Koštamukšen nuoret ta lapšet šuahah viettyä aikua šiinä.
Skeittipuiston rakentamini kuuluu Koštamukšen luajah kunnoštamiseh, min tarkotukšen on luatie mukavie julkisie lepotiloja eri-ikäsillä ihmisillä. Näin, federalisella tuvella on jo kaunistun Kontokkijärven rantakatu. Šuunnitelmissa on rannan toisien ošien kunnoštamini.
Yhty Oman Median MAX-kanalah!
