Kipinä valmistautuu Uuteh vuoteh ta peluau Memoh
Karjalankieliseššä Kipinä-kuvalehešša aina on äijän arvailtavua, luvettavua, leikattavua ta muistih pantavua.
Uuši vuosi on jo kynnykšellä. Kipinä-lehen pimiekuun numeron šivuja šeluallen šie löyvät talvella omissettuja šivuja: arvuat Talvilinnut-šanarissikön ta Talvel pihas -aivopähkinän, šuunnittelet 50 asieta talvekši ta valmissat mukavan Ozan sukku -luajokšen pruasniekakši.
Šamoin kuvaleheštä šie luvet kaunehie runoja, Irina Nikitinan Harraššuš-starinan ta Sergei Georgijevin vesselöjä kertomukšie Anni-tytön vilkkahašta elämäštä šekä šuat tietyä, mimmoni merieläin šie olet Merihoroskopin mukah. Aleksandra Lesosen Puanajärvi on alkuperäni pohjoisuarreh -kirjutukšešta šie tiijuššat kanšallispuiston mahtavista nähtävykšistä. A Valentina Mironova artikkelissah “Nuoril ainos omat tavat” kertou šiula, mimmosie tapoja ta pitoja oli ennein nuorilla neiččysillä ta prihoilla.
— Kipinä-lehen uuvvešša numerošša on hyvin äijän erilaisie tehtävie: šanarissikköjä, aivopähkinöjä, šanatehtävie. A stolakisojen tykkyäjät löyvetäh mukava Kalastajan kodah päiväkse -peli ta tunnetun Memo-kisan nelläš oša. Šiihi vaššen vuuvven oloh kuvalehen toimittajat aina lisättih uušie korttija. Konša lapši keryäy kaikki kortit yhteh, ni šuau täštä kisašta mukavan homman kotijoukolla tahi kaverien kera ajan vietokši, on varma kuvalehen toimittaja Ol’ga Smotrova.
Pimiekuun kuvalehen korissukšena on vuuvven 2026 kirkaš ta kaunis kalenteri, kumpasen piirušti taiteilija Margarita Jufa.
Yhty Oman Median kanualah Telegramas!
