Läksi eloho uz’ vepsänkeline ”Kipinä”-kulehtesen nomer. Täl kerdal žurnalan lugijad tedištaba enamba Petroskoin polhe kuvataidehen abul. Täl vodel P’otrale I tauduiži 350 vot. Hän om Petroskoin augonpanii. Karjalaižed pirdajad kuvaziba Petroskoin sauvotesid da irdoid ičeze kuviš. Kacuhtam niihe ühtes.
Ristitud vähän tedaba ičeze hibjas. ”Kipinä”-žurnalas tö voit löuta melentartuižid tedoid sen polhe. Ozutesikš, om-ik huba itkta sil’miden täht da miččed hibjan palad voiba kazda kogonaižen ristitun elon i muga edemba.
”Kipinä”-žurnal ezitab teile uden kirjan vepsän kelel. ”Nel’l’ dölod”-kirj läksi eloho Petroskoi-lidnas ”Periodika”-paindištos. Sen tegii om meiden hüvä sebranik Natalja Silakova. Sarnan neciš kirjaspäi lugem ühtes.
― Mugažo udes nomeras om kirjutadud informacii udes konkursas. ”Kipinä”-kulehteses zavodiše ”Ole hüvä, ole terveh!”- konkurs. Mö kucum tahtnikoid ühtnemaha konkursaha sebranikanke, kanzanke vai ühtenklassnikoidenke. Parahimad töd paindam meiden kulehteses ”Teiden ičetoi lehtpolil”-rubrikas, sanub ”Kipinä”-žurnalan toimitai Darja Švecova.
Tradicijan mödhe žurnalas om äi melentartuižid tegendoid, kebnoid kodvusid da vändoid. Čoman stolvändon vaumiči Jevgenii Fotejev.