Periodika-julguamon levon al toimii lapsien Kipinä-žurnualu tänä vuon täyttäy 40 vuottu. Se on perustettu vuvvennu 1986 Karjalan kanzallizen kirjuttajan Jaakko Rugojevan kehoitukses.
— Žurnualan vuozipäivän kunnivokse valmistimmo kviz-kižan, kuduah kučuimmo suomelas-ugrilazen školan opastujii da Vesl’ažed-pajojoukon lapsii. Hyöhäi ollah meijän lugijat da meijän žurnualah kirjuttajat da čomazii luadijat. Sendäh meil on ylen tärgei vastavuo lapsien kel, valmistua heile kaikenmoizii pidoloi. Täl kerdua kilbuniekkoi javoimmo viideh joukkoh, taričimmo heile kyzymyksii karjalazien, vepsäläzien da suomelazien kielih da kul’uurah nähte. Oli kilvas muuzikkukyzymysty, videoarbaituksii. Lopus piimmö arbajazet, ku jogahizele pidoh tulluole jiäs mustokse mittuinetahto pieni lahjaine — magniettu, kniigansivunmerki, rynnäsmerki, korti, piirdin, sanoi Oma Mediale Kipinän piätoimittai Jana Filimonkova.
Kipinän pruazniekas sai kuulta Lastenpiiri-joukon nuorii pajattajii.
Suomenkielizenny žurnualannu taibalehen alganuh julgavo vuvves 2011 ilmestyy eri noumeroinnu karjalan, vepsän da suomen kielil. Karjalan tazavallan školis karjalua, vepsiä da suomie opastujat viijendes kaheksandeh kluassassah joga kuudu suajah Kipinä ilmai. Net kulut maksau tazavallan b’udžiettu.
Yhty Oman Median kanualah MAX:as!