Kielen maltajii kučutah lugemah “Kalevalua”
Petroskoin valdivonyliopiston filolougien instituutan baltiekkumerensuomelazen fololougien laitos da Karjalan tiedokeskuksen Kielen, literatuuran da histourien instituuttu ilmoitettih perindöllizen Luvemmo Kalevalan runoloi -kilvan. Se on omistettu Kalevalan päiväle, kuduadu pietäh 28. tuhukuudu.
Kilbah voijah yhtyö Karjalan, Udmurtien, Komin, Mordouvien tazavallois da Tverin Karjalas eläjät — 12 vuottu vahnembat školaniekat, keski- da yliopistoloin opastujat, kuduat maltetah karjalan, vepsän da suomen kielii.
— Mennyt vuon kilbah yhtyi enämbi 60 hengie. Tämänvuodehine kilbu on jo seiččemes. Olemmo hyväs mieles, ku vuvves 2024 algajen kilbuniekoin keskes on ei vaigu Karjalas eläjii. Suurendimmo kilvan piendän alovehen, sanou Petroskoin yliopiston baltiekkumerensuomelazen fololougien laitoksen piälikkö Tatjana Paškova Oma Mediale.
Kilbuniekal pidäy vallita 35—50 rivie pitky katkelmu Kalevala-runoelmas, luadie video da työndiä sen kilbah.
Kilbua pietäh kolmes igäjoukos: 12—15vuottu, 16—23 vuottu, 24 vuottu da vahnembat.
Voittajii vallitah kolmes nominatsies: Kalevalan runuo karjalan kielel (livvin murreh, lyydin murreh, varzinkarjalan murreh), Kalevalan runuo vepsän kielel, Kalevalan runuo suomen kielel.
Kilbuniekoin videoloi otetah vastah tuhukuun 28. päiväh suate. Kilvan tulokset ilmoitetah kevätkuun 20. päiväh suate. Ližätieduo kilbuniekkoih nähte.
Ilmoitetun kilvan piätarkoituksennu on popul’ariziiruija Kalevala-runoelmua, karjalan, vepsän da suomen kielii, sytyttiä mielenkiinduo kandurahvahien kul’tuurah, opastua nuorižuo ezittyö suuren rahvasjoukon kuulten da nähten.
