Kižin tortu rodih parahimakse Moskovas
Moskovas piettih painovoiman vastazien magieloin pastoksien II kanzoinväline kilbu. Ven’an eri kohtis da Valgoven’alpäi tulluot 70 kondiiterua pastettih 95 tortua. Petroskoilaine pastai Oksana Bessarabova puutui parahien joukkoh.
— Konzu oli ilmoitettu kilvan aihe — Moine erinomaine Ven’a — minä kerras piätin, ku otan aihiekse kuduantahto Karjalan mustomerkin. Valličin Kižin suaren. Ammui, vuvvennu 2000 olin sie käymäs. Äijät kilbuniekat da kilbah tulluot tunnustettih meijän Kižit, sanoi Oma Mediale Oksana Bessarabova.
Oksanan luajitus tortas suau nähtä sammaldu, järvi, kižanka-venehen — kai net ollah syödävät da magiet. Oksana piäzi enzimäzele sijale nominatsies ”Pruazniekkutortu”.
Se on kolmas suuri kilbu, kuduah yhtyy petroskoilaine pastai. Enne tädä kilbua oli toine sija Moskovan kilvas parahas lapsien tortas, kolmas sija Minskas pietys kilvas. Da hätken vuotettu da lunnastettu voitto Moskovan kilvas.
Buuhgalterikse opastunnuh Oksana jo enämbän 10 vuottu ruadau kondiiterannu. Häi ainos korrendau omua magieloin pastajan neruo. Painovoiman vastazien pastoksien tehnikkah häi opastuu jo viizi vuottu.
— Kilvan siändölöin mugah kilvas ozutettaval tortal pidäy olla ”syödävy” — zuaharikakku da voi- libo kannatesvuahti. Arvostajat pannah ballat konstruktsien vaigevuos, čomenduksien keinolois, erinomazis effektois, magevuos. Joga kondiiteru tuou arvostajile erillizen tortan, kuduadu hyö opitah da arvostetah sen magevuttu. Arvostajat opitah tostu tortua, ei ozutettavakse panduu. Kižit toin järilleh kodih, sanoi Oksana.
Aihies voit lugie vepsäkse da ven'akse.
