Kiži-sarel lopi ičeze radon “Rahvahiden škol”
“Kiži”-muzejan radnikad ühtes “Baltianmeren suomalaižiden rahvahiden liga” -sebranke vedi opendusen Venäman suomalaiž-ugrilaižiden rahvahiden ezitajiden täht.
Opendusen ühtnikoile starinoitihe “Kiži”-muzejan rados, mugažo projektan aigan mäniba interaktivižed programmad, mastar’-klassad, ozuteluzmatkad, tematižed urokad, projektoiden prezentacijad.
— Meidennoks tuliba aktivižed mehed suomalaiž-ugrilaižiš regionoišpäi. Päazjan hö radaba küliš, kus kaičeba da kehitoitaba ičeze rahvahan kul’turad. Opendusen ühtnikad jagoihe ičeze radon mahtištol da tarjoičiba “Kiži”-muzejale uzid idejoid kehitoitandan täht, starinoiči projektan pämez’ Anna Anhimova.
Projektan päidei om siš, miše suomalaiž-ugrilaine norišt ühtniži enamba rahvahiden kul’turiden kehitoitandaha, vajehtaižihe idejoil da aktivižemba kävutaiži hüväks regionoiden kul’turmahtištod.
“Rahvahiden škol” mäni kuz’ päiväd, 30. heinkud — 4. elokud. Openduz tehtihe “FUMM. Suomalaiž-ugrilaižed norišton matkad” -projektan aigan, se rahatugetas Karjalan pämehen grantoiden fondal.
