Kičči-Kočči lähti viijendele
Periodika-julguamon seinis viizi vuottu tagaperin alguh pandu lapsien Kičči-Kočči-joukko algai uvven opastusvuvven.
— Meil ei tävvy neičykköi, heidy ottazimmo joukkoh hyväl mielel. Kučummo lapsii, ket jo kävväh enzimäzeh kluassah, 7—10-vuodehizii, sanoi Oma Mediale Kičči-Kočči-joukon opastai Alina Kartinen.
Täkse aigua joukos on 12 kazvattii, kudamien igä on kuvves vuvves kahtehtostu vuodessah. Lapset kerävytäh joukkoh kaksi kerdua nedälis — ezmässargen da nellänpiän. Opastajat Alina Kartinen da Marina Tukkija opastetah heidy soittamah perindöllizis kanzallizil soittimil, paiči sidä lapset pajatetah karjalakse da vepsäkse, tansitah perindöllizii rahvahallizii tansiloi. Heile valmistetah vastavuksii tuttavien da kuulužien ristittyzien kel — muuzikkualan ruadajien, kieliniekoin kel.
Lapsil on kogemustu konsertois da erilazis pidolois ezittyjes. Paiči Periodikan pidoloi Kičči-Kočči-joukon kazvattiloi sai kuulta da nähtä tazavallan suuris festivualilois. Tänä kezän hyö pajatettih vepsäläzien Elonpu-pruazniekas. Sygyzyl, ligakuus heidy kučuttih vepsäläzes Kaleg-kyläs piettäväh Pajokeräine-festivualih.
Yhty Oman Median kanualah MAX:as!
