“Kiži”-jumalanpertin formas tort tegihe parahimaks Moskvas
Moskvas mäni II Rahvahidenkeskeine antigravitacionižiden tortoiden čempionat. 70 konditerad erazvuiččiš Venäman da Belorussian agjoišpäi paštoiba 95 tortad. Petroskoin magedusiden tegii Oksana Bessarabova putui parahimiden keskhe.
— Konz oli tedotadud “Mugoine čoma Venäma” -konkursan tem, minä sid’-žo pätin, miše ičein tortan täht otan Karjalan melentartuisijoid. Minä valičin “Kiži”-saren. Olin sigä amu, vodel 2000. Äjad konkursan ühtnikad da čempionatan ühtnikad tundištiba meiden Kižid, sanui “Oma Media” -portalale Oksana Bessarabova.
Oksanal tehtud tortal oma samlod, järv’, kižanka-veneh da Gospodan Preobraženijan jumalanpert’ – kaik ned oma södabad da magukahad. Oksana sai ezmäižen sijan “Prazniktort”-nominacijas.
Nece om jo koumanz’ sur’ konkurs, miččehe ühtni Oksana. Edel necidä konkursad hän sai toižen sijan Moskvas parahimas tortas lapsiden täht da koumanden sijan konkursas, mitte mäni Minskas. A nügüd’ Oksana sai pit’kha varastadud da arvostadud vägestusen konkursal Moskvas.
Oksana om buhgalter, no radab magedusiden tegijan jo enamba 10 vot. Hän kaiken aigan paremboičeb ičeze mahtoid. Antigravitacionižid tortoid hän tegeb jo viž vot.
— Sändoiden mödhe konkursal ozutadud tortale pidab olda «södaban» — magedan tortan voi- vai kandatezvahtonke. Žürijoukun ühtnikad andaba balloid tortoiden konstrukcijoiden jügedudes, čomenzoitusen mahtoiš, eriližiš effektoiš da magus, starinoiči Oksana Bessarabova.
Uzištoid neciš temas voib lugeda mugažo karjalaks da venäks.
