“Keradamižen aig”: ozuteluz, mitte ühtenzoitab ristituid
Radonmahtoiden pertiš radab “Keradamižen aig” — tradicionaližen da istorijaližen sädon ozuteluz. Eksponatoiden tegijad oma mastar’ Natalja Denisova da hänen üks’henged. Siš tedotadas Karjalan Rahvahaližen sädandradon da kul’turiniciativoiden keskusen oficialižel lehtpolel.
Ozutelusen nimi om ani simvoline. Natalja Denisovan sanoiden mödhe, hän laps’aigaspäi mahtab ühtenzoitta ümbri ičesaze ristituid ühthižel idejal. “Keradamižen aig” om-ki päidei: ozutelusel om keratud sädod, miččed Natalja tegi ičeleze da toižile mehile, a mugažo hänen kollegoiden radoid — ozutesikš, čomitesid — da hänen kursiden openikoiden radoid.
— Kaik nene sädod tobjimalaz kaitas erazvuiččiš lidnoiš da regionoiš, i nece ozuteluz tegihe mugoižeks aigaks, kus kaik om keratud ühthe sijaha, sanui Natalja.
Ozutelusel om pandud ezile läz 20 sädod: Karjalan tradicionaližiden karjalaižiden da venälaižiden naižiden sädod, inkerilaižiden naižiden sädod, ves’-, korela- da sum’ -heimoiden keskaigan sädod, a mugažo istorijaližiden sobiden pohjal tehtud fantastižed sädod.
Kaik eksponatad om ombeltud elon täht: ned pidetas, niiš ezinedas. Keskaigan sädoiden čomitesed da aksessuarad om tehtud mastaril Venäman erazvuiččišpäi sijoišpäi, a praznikaližed pähižed — Nataljan üks’hengil “Matura” -tradicionaližen sädon klubaspäi da “Vokrug Krosno” -studijan openikoil.
Ozuteluz radab sulakun 24. päivähasai adresadme: Petroskoi, Kirovan ird, 13.
Uzišt neciš temas voib lugeda mugažo karjalaks.
Tarkištele "Oma Median" Telegram-kanalad!
