Karjalan rahvahan sebr jatktab kuvata videourokoid, sjomkoihe tartui vepsänkeline-ki grupp.
Kaiked karjalan da vepsän keliden opendamižehe ühtneb 15 openikad, viž mest om kaikuččes gruppas. Ezmäi kuvadaijoukun planoiš oli vähemba ühtnikoid. No projektan prezentacijan jäl’ghe ozutihe uded tahtnikad. Kaik openikad oma eri-igäižed da erazvuiččiš sijoiš radajad mehed. Kaikuččel om ičeze sü opeta Karjalan igähižiden rahvahiden kelid. Karjalan kelen livvin da pohjoižkarjalan paginoil om jo kuvatud enamba pol’t openduzkursad. A vepsänkeline grupp vaiše zavodi opendamišt. Opendajaks valitihe Suomalaiž-ugrilaižen školan vepsän kelen opendai, äjiden openduzkirjoiden avtor Nadežda Petrova.
— Varaižin, kut mäneb ezmäine urok. Holduin, miše openikad oma ani erazvuiččed, miččed hö linneba, kut vedäškaba ičtaze, kut heil mäneb opendamine. No ezmäine päiv ozuti, miše openikad minai oma lujas mahtokahad i heil om sur’ melentartuz’ vepsän kelen opendamižehe, sanub hän.
Openikoiden keskes oma hibuz’mastar’, školan pämez’, zakonantegemižen sobranijan deputat, fotokuvadai da omblii. Kümnes urokas heile pidab opetas starinoičemha vepsäks ičesaze, ičeze perehes, radsijas da melentartusiš.