Kešä on kyläpruasniekkojen aika
Mujejärven piirin Ontajärven kylä täytti viime netälinloppuna 425 vuotta. Merkkipäivänä piettih kutomisen ta karjalaisien piirakkojen paistamisen muasteri-oppija, opašretkijä kylyä myöten. Keškitapahtumana oli arvokkahan vierahan ierei Andrei Prijezževin vaštautumini kyläššä ta Georgii Voitontuojan časoun’ašša.
– Joka kylällä on vain šillä ominaini kulttuuri ta kyläpruasniekka antau paremmin ymmärtyä šitä. Kyläläisillä, kumpaset ei eletä enyä kotirannoilla pruasniekka tulou hyväkši šyykši tulla kotih, šano Andrei.
Viime netälinloppu oli kesävierissän keškiaika. Perintehellisešti šitä juhlitah Korzan kylän ainutluatuisella kylyjen kavulla. Kaikki vierahat šuatih tutuštuo vierissän ta kylyššä kylpömisen perintehih. Šekä kaččuo Siämjärven kylien kollektiivien konserttie.
Pieni vuotisjuhla vietti Jallahen kotišeutumusejo. Še oli avattu 10 vuotta takaperin, konša juhlittih 430 vuotta enšimmäiseštä maininnašta täštä kyläštä. Tänä vuotena kylä täytti 440 vuotta.
– Jallahešša on hyvin kehitetty šukututkimuštoiminta. Pruasniekašša myö kertoma mitein eččie juurija. Niise pitimä opašretki musejošša ta näyttimä 10 vuuvven ečintäruavon tulokšie, šano musejon johtaja Tatjana Ščerbačova.
Pruasniekan aikana oli ašetettu tunnettu jalokivišepän Mihal Perhinin muissokši omissettu nimitaulu.
Tietyšti ei šua jättyä huomijotta Kalaštajan päivyä. Še on perintehellini Sohjanankošen pruasniekka, šentäh kun kaikki kyläläiset ruattih kalatehtahalla. Muissokši niistä ajoista jäi pos’olkan pruasniekka. Erikoisvierahina oltih Neptun-merijumala ta vesiemäntä, a heitä huvitettih Kalevalan teatteri, runoilija Sergei Jakovlev, Kiestinkin Ualto-lauluryhmä. Paikalliset karjalaiset emännät tarittih kalašyömisie eri mavun mukah.
Šuurin kalaštajien pruasniekka oli Kižin šuarella. Kisoja ta kilpailuja, lukusie muasteri-oppija, kalaruokie ta perintehellisie juomie, vanha kila-kilpapeli apajista oli ohjelmašša. Oneganniemen eläjillä järvi oli kuin pelto, a kala, kuin toini leipä.
Šeurakkua Karjalan kyläpruasniekoista, joka netälinloppuna šuau löytyä ičellä miellyttävyä ajanviettuo.
