Kaskesniemen AYI:n ruado algavui vuvvennu 2018. Silloi paikallizet eläjät Kaskesmiemen järven randah luajittih huogavokohtu: azetettih lapsienkižuandukohtu, lidžut da verko verkomiäččyh kižuajile. Myöhembi, jo toizen projektan mugah, huogavokohtale suadih kundoilulaittehet.
Tänävuon kyläh nostettih veziporras tulipalomašinoih niškoi.
Paikallizih eläjih da duaččuniekkoih niškoi tämä ruado on ylen tärgei.
– Endine veziporras jo ammui rodih lahokse parzitukakse. Dai rahvastu varaitti lapsis tuači: paikallizet tyttözet da brihačut käydih sinne kezoile, hädä voinnus roita joga hetkel, sanou Nuožarven kyläkunnan aktivistu Alina Gapejeva
Projektan hindu on 330 612 rubl’ua, 298 tuhattu rubl’ua nämmis den’gois suadih Tazavallan b’udžietaspäi, 2 612 rubl’ua – Nuožarven kyläkunnan b’udžietaspäi da 30 tuhattu rubl’ua Kaskesniemen eläjät annettih iče. Tämä on aiga suuri panos moizeh pieneh kyläh niškoi.