Karjalazien, vepsäläzien da suomelazien istundo: paginal oldih Voitonpäivy da kul’tuuru
Karjalazien, vepsäläzien da suomelazien edustajien nevvoston vuoronmugaine istundo piettih 15. oraskuudu ”Kandelehen kois”. Vuvvennu 2025 Ven’al kunnivoijah Suuren Voiton 80-vuozipäiviä. Karjalan tazavaldugi aktiivizesti yhtyi sih ruadoh.
Nevvoston istundos oli paginua yhteiskunnallizien liittoloin projektois, kuduat ollah omistettu Ižänmuallizes voinas voiton merkipäiväle.
— Karjalan Rahvahan Liitto oman projektan hantuzis pidi äijän piduo, kuduat oldih omistettu Voitonpäiväle. Liittolazet suurel joukol käydih Karjalan eri piirilöih sanelemah voinan tapahtumis, niilöin vuozien suures histouriellizes merkičykses. On ylen hyvä, ku meijän pidoloih yhtyi äijy lastu da nuordu, sanoi Oma Mediale Valentina Mironova, Karjalan Rahvahan Liiton johtokundah kuului.
Nevvoston istundos paginal oldih Kandeleh-ansamblin da Karjalan Kanzallizen teatran ruado. Sego kul’tuuru da muuzikkukolledžan da Petroskoin konservatourien opastajat kerrottih niilöin taidojoukkoloin johtajien valmistandas, kenen ruado on kiini Karjalan kandurahvahien perindöllizen kul’tuuran säilyttämizes, kehittämizes da popul’arizatsies.
Tämänkerdazen istundon vedäjänny oli Roman Golubev, kudai vaste ei ammui on pandu Karjalan tazavallan piämiehen sijahizekse da valvou syväinpuolizen poliitiekan azieloi.
