Karjalazien valattamizen vuozipäivy: ruado jatkuu
Ven’an prezidentan Vladimir Putinan käskyn mugah karjalazien valattamizen 800-vuozipäiväkse piettävien pidoloin valmistamine jatkuu.
— Se ei ole muite vai merkipäivy, se on meijän histourien da kul’tuuran alužin, tärgei tapahtumu syväindyö, tarkoituksien da todevuttamizen mugah. Se ongi mahto todevuttua tärgiet infrastruktuuruprojektat, kirjutti Karjalan piämies Artur Parfenčikov omassah VK-sivul.
Kanzallizen Kul’tuuru-projektan mugah kohendettih Suojärven taidoškola da kul’tuurutaloi Lahkolammis. Kanzallizen Pereh-projektan hantuzis piettih Suojärven kul’tuurukeskuksen remontu.
Ven’an kul’tuuruministerstvu kannatti vie kuuzi Karjalan tazavallan zajavkua. Niilöin mugah kohendetah Suojärven keskuskirjasto, Pitkänrannan muuzikkuškola, kirjasto da kul’tuurutaloi, Sordavalan nuorižokeskus.
Merkipäiväh valmistujes kohendetah Kurkijoven kodirannankeskus. Sen rakendus on nostettu 1870-luvul. Sit kohendetah ulgoseinät, uvvistetah pertit sydämes. Vuvven 2027 pluanois on Pitkänrannan Sebinan nimellizen kodirannanmuzein kohendamine.
Suojärveh da Sordavalah avatah hengellis-opastuskeskukset, jatketah kaivospiälikön koin kohendamistu Petroskois, kunne jällespäi sijoitetah pravosluavien muzei.
— Erilline aihe on meijän kirikkölöin rekonstruktsii. Kohendammo Aleksandr Nevskoin kirikkyö Petroskois, vahnoi kirikkölöi — Pyhän Miikulan Salmis da Smolenskoin Jumaldoman Anukses. Uvvessah nostammo pyhän Faddein časounua Kirovan lagevol, kirjutti Parfenčikov.
Aihies voit lugie suomeksegi.
Yhty Oman Median kanualah MAX:as!
