Karjalazien valattamizen 800-vuozipäiväkse: ruado jatkuu
Ven’an prezidentan Vladimir Putinan käskyn mugah merkittäviä vuozipäiviä ruvetah pidämäh vuvvennu 2027. Karjalazien valattamizen 800-vuozipäivän pivot on suunnattu omanmuansuvaičuksen da Ven’an yhtevyön orientiiroin säilyttämizeh da lujoittamizeh.
Tazavallan piämies Artur Parfenčikov Karjalan haldivon ruadoistundos saneli merkipäivän valmistazen ruadolois.
— Kurkijoven kylä rodieu yksi niilöis keskuksis, kus pietäh valattamizen 800-vuozipäivän tärgevimii pidoloi. Piemmö sie Kurkijoven kodirannan keskuksen kahten rakenduksen kohendusruadolois. Rubiemmo jatkamah yhtehisty ruaduo federuallizen keskuksen kel — kohendamah da elavuttamah tazavallan hengellizen kul’tuuran mustomerkilöi, sanoi Karjalan piämies Artur Parfenčikov omassah lehtistöpalvelule.
Karjalalazien valattamizen 800-vuozipäivän pidämizeh kuulutah kirjoin painamine, niilöin luvus moiziengi, kudamii ruvetah käyttämäh tazavallan školis, dokumentufil’man luadimine, festivualiloin, ozutteluloin pidämine, sego kul’tuurualan laitoksien da kul’tuuruperindöh kuulujien rakenduksien kohendamisruavot.
Heinykuun lopus Petroskois allettih kohendua Kaivospiälikön taloidu, kuduan pohjale luajitah pravosluavien muzei. Ven’an pravoslavnoin kirikön kel yhtes luajitah hengellizii opastundukeskuksii Suojärveh da Sordavalah.
Valattamizen 800-vuozipäivän pidoloin hantuzis Sordavalan linnah on azetettu kniäzi Jaroslav Vsevolodovičan mustopačas. Mennyt vuon Suojärves perustehellizesti kohendettih taidoškola, Lahkolammis kohendettih Kul’tuurutaloi.
Tämän opastunduvuvven allus meijän školien 5.—7. kluasoin opastujat ruvetah opastumah Karjalan histouriedu Meijän rannan histourii, Karjalan tazavaldu -opastuskirjan mugah. Sen valmistettih vuvvennu 2024 Karjalan tiedomiehet.
Vuvvennu 2025 Taidomuzei valmistau pohjaisobrazoin katalougan.
Kurkijoven kodirannan keskukses valmistetah ozutteluu, kuduah ruvetah kuulumah arheolougizet, kirjallizet dokumentat da obrazat, kuduat kuvatah XIII—XVIII vuozisuan Kurkijoven pogostan histouriedu. Se ruado kestäy vuodessah 2027.
— Kul’tuuruperindön objektoin uvvistamine jatkuugi vuvven 2027 jällesgi, sendäh ku myö ainos kiännymmö omien juurien puoleh, säilytämmö da lujoitammo omii hengellizii kallehuksii, sanoi Karjalan piämies.
Artur Parfenčikov käski jatkua yhtehisty ruaduo federuallizen keskuksen kel karjalazien valattamizen 800-vuozipäiviä valmistajes.
Aihies voit lugie suomeksegi.
