“Unis da mierol” on karjalankieline monolougu-ozutus. Se kerdou Raja-Karjalan Hyrzylänmutkas roinnuon Santeri-brihan kazvandukerdomuksen lapsusaijois aigužuoh sah. Monolougan enzi-ildu rodieu suovattan 2. ligakuudu 2021 Taibalehen Valistustalois Liberis.
Timoi Munne keksi monolougan idejan käveltes poštujuaššiekalluo kois Viinijärvel keviäl 2014. Tekstu algoi eliä samazen vuvven sygyzyl nähtys unes. Sen jälgeh syväindö on haudunuh ja pyörinyh piäs. Nygöi on roinnuh aigu jagua tämä koskettai kerdomus toizile.
– Monolougu pohjavuu histouriellizih tozidieloloih. Vuvvennu 1939 talvivoinan aigah Suojärven Hyrzylänmutkan eläjät jiädih Nevvostoliiton hyökkävyksen periä ruskien armien okkupatsien ual. Talvel heidy siirrettih Interpos’olkan luagerih sivil’noloikse voinuvangiloikse. Voinan loppiettuu keviän lopul 1940 heijät piästettih järilleh Suomeh. Vuvven 1944 jälgeh heile ei olluh enämbiä nimittumua dieluo Hyrzyläh. Karjalazile pidi harjavuo uudeh elokseh uuzis eliändykohtis, uuzis ololois. Oma kieli, viero, eloksentavat da identitiettu puututtih koittelukseh, sanou Timoi.
Täs ainavoluaduzes, enzimäzes ammatillizeh luaduh Suomes luajitus teatrumonolougas, karjalazien ozua kačotah pienen brihan nägökohtaspäi.