Karjalazien eepillizet pajot sanottih kogo Ven’an rikkahuokse
Karjalazien eepillizet pajot — runot kirjutettih Ven’an federuallizeh ei-ainehellizen etnokul’tuuruperindön objektoin luvetteluh. Net on pandu kirjoile — n:u 00087-10-2025.
Materjualat luvetteluh näh valmistettih Moskovan valdivollizen taidotutkimusinstituutan taijon doktoru Ol’ga Aleksejevna Pašina, Petroskoin valdivonkonservatourien taijon kandiduattu Vera Švetsova da Karjalan tiedokeskuksen Kielen, literatuuran da histourien instituutan filolougien kandiduattu Valentina Mironova. Karjalazih eepillizih pajoloih nähte materjualoi valmistettih kieliniekku, folkloristu da kaksi taidoalan spetsialistua sendäh, ku yksielpäi runot ollah suusanallistu folklourua, toizielpäi net ollah pajoloinnu pajatettavat. Sendäh tutkie da šeikuija niidy pidäy yhtenny objektannu.
Vahnat eepillizet pajot ollah karjalan rahvahan ennevahnazen histourien, perindölöin da tavoin kuva. Sen pohjal Elias Lönnrot kirjutti omassah kuulužan ”Kalevalan”. Karjalazien runoloi erinomažuksennu on kalevalalaine ritmu, se luadiu eepillizet pajot mustoh painujikse da meloudizikse.
— Karjalazien eepillizet pajot ollah vahnimii, midä Ven’al tietäh. Federuallizeh luvetteluh runoloin kirjuttamine tarkoittau sidä, ku Ven’an tazol ellendetäh da pannah silmäle niilöin erinomažuttu, tärgevytty da ainavoluaduvuttu, toizin sanojen, ku net äijän merkitäh kogo Ven’an kul’tuurah nähte. Paiči karjalazii runoloi luvetteluh kuuluugi Jakuutien Olonho-eepossu, kudai kuuluugi JUNESKO:n luvetteluh. Paiči suusanallizii folklouran žanroi luvetteluh voijah puuttuo rahvahallizet tavat, perindöt, pruaznienat, käzinerot, sanommo, bovat libo kirjoindehet, sanoi Oma Medaile folklouran tutkii Valentina Mironova.
Tazavallan tazol runoloin federuallizeh luvetteluh kirjuttamine tarkoittau sidä, ku valdivovallal da virgumiehil karjalazien runoloin ainavoluaduvuttu ellendäjes pidäy kiinnittiä niilöih enämbän huomivuo, eistiä niilöi edeh, sanella niilöih nähte da kaikelleh kannattua.
Ližiä tieduo karjalazih runoloih, sen histourien da tutkimizeh nähte täs.
Aihies voit lugie ven'aksegi.
Yhty Oman Median kanualah Telegramas!
