Karjalazet tiedomiehet jullattih liygiläzien kylien nimisanakirju
Karjalan tiedokeskuksen Kielen, literatuuran da histourien instituutan tutkijat Denis Kuzmin, Irma Mullonen da Jekaterina Zaharova valmistettih da piästettih ilmoih uvven tiedokirjan — ”Liygiläzet kylät A:s A:ssäh: eländykohtien nimilöin sanakirju”. Ruado kesti nelli vuottu. Sanakirjah kuuluu enämbi 650 tiedokirjutustu niilöih Savi-Karjalan eländykohtien ven’alazih da karjalazih nimilöih nähte, kudamis perindöllizesti eläy liygilästy karjalastu.
Kielen, literatuuran da histourien instituutan tutkijat jo mondu vuottu tagaperin piätettih ottavuo suureh projektah — luadie ”Karjalan paikannimilöin sanakirju”.
— Se pidäy ei vaigu jälgimäzien vuozikymmenien matkoin aigah da arhiivoispäi suaduloin tuloksien sellittämizekse da julguamizekse, ga vie siksegi, ku rahvahan sellittämizen rinnale, kudai Internetan vuoh leviekse piäzöy, lujendua tiedokandah da tovellizeh histourieh perustujua Karjalan eländykohtien nimilöin sellitysty, kerdou Jekaterina Zaharovan sanoi Karjalan tiedokeskuksen lehtistöpalvelu.
Se ruado vuadi enzisijah tutkijoi. Kielen, literatuuran da histourien instituutan paikannimistöarhiivas on lähes 300 tuhattu paikannimie. Sendäh, ku lienne sijoittua se ainehisto yhten kirjan kanzih, se rodies aiga sangei. Tutkijat piätettih jagua tutkimus nelläh palah: lyydiläzien, liygiläzien, varzinkarjalazien da oniegantagavozen paikannimet.
Tutkijoin mieles liygiläzet da lyydiläzet annettih omile eländykohtile nimet samah luaduh — enzimäzien eläjien nimilöin mugah. Suvi-Karjalas on äijy jogie, ennevahnas rahvas sijoituttih elämäh jogiloi myöte. Konzu rahvas eistyttih syvembäle meččäh da loitottih jogilois, eländykohtile ruvettih andamah nimilöi järvilöin da selgien mugah.
Sanakirjua luadijes tutkijat käytettih ruadomatkoin aigah kerättyy ainehistuo, histouriellizii kirjoi da ennevahnazii kartoi. Sanakirjah on painettu piirilöin da kylänevvostoloin kartoi-shiemoi, kudamien vuoh on kebjei löydiä endine kylän nimi nygyaigazeh verraten.
Nygöi tutkijat ottavutah Oniegantagavozen da Puudogan piirin, Karjalan keskialovehen da pohjazen paikannimilöin sanakirjoin luadimizeh.
Aihies voit lugie ven'aksegi.
Yhty Oman Median kanualah Telegramas!
