Karjalastu pajuo kuuluu ”Bes’odazes”
Čalnan kylän Bes’odaine-naispajojoukko täyttäy 35 vuottu. Vuozipäivykonsertas suau nähtä nimipäivyniekkoi, paikallizii da tulluzii artistoi. Pivole on annettu nimi ”Rubiemmo pajattamah — rubiemmo elämäh”. Aiga pitky vuozipäivykonsertu, kuduas rodieu 23 noumerua da äijy hyvittelyy, pietäh 29. kevätkuudu 14.00 čuasun aigah Čalnan kylän kul’tuurutalois.
— Tahtozimmo, ku meile tuldas pajattamah da ezittymäh meijän ammuzet tuttavat, kenen kel puutui seizuo yhtel laval. Ku yhtes voizimmo pajattua rakkahat pajot. Oman Pajon kel pajatammo ”Astui Nastoi”, Siämärven pajojoukon kel — Ongo kaunis Karjala. Ven’ankielizen Pitaritsi-joukon kel hol’aitammo Ivan L’ovkinan kuulužan ”Duarju-kezriäjy”, Garmonija-joukon kel — Galina Hanenkon kirjutetun pajon Čalnan kyläh nähte. Lopus kaikin yhtes pajatammo L’ubov’ Nikitinan da Aleksandr Volkovan ”Terveh, Karjal”, sanoi Oma Medaile Emma Jolina, Bes’odaine-joukon ohjuaju.
Tullah pruazniekkupidoh paikallizetgi pajattajat da tansijat. Čalnan kylän Päiväzen sugahazet -joukon lapset ruvetah tansimah da Randu-folklourujoukon nuoret pajattamah, kanzallizien soittimien Teremok-orkestru soittamah da ven’ankielizeh Garmonija-joukkoh kuulujat naizet pajattamah.
— Konsertah valmistujes naizil toiči kyynälet nostih silmih, moine oli hyvä mieles, ku heijän kel yhtes laval roitah lapset da nuoret, oman kylän rahvas da ammuzet tuttavat, sanoi Emma Jolina.
Vuozipäivykonsertu luajitah perindöllizen karjalazen bes’odan tabah. Sit kajahtahgi nimipäivyniekan nimi. Naizet ruvetah kaiken konsertan istumah laval, vuorotellen heidy hyvittelemäh da yhtes heijän kel pajattamah tullah konsertah kučutut artistat.
Yhty Oman Median kanualah Telegramas!
