Karjalas zavodihe “Ectes pärunod” -sädandkonkurs
Karjalan eläjid kuctas ühtnemaha “Ectes pärunod” -sädandkonkursaha, mitte om omištadud Karjalan runon päiväle (10. kezakud), siš tedotadas Karjalan Rahvahiden sebruden kodin oficialižel VKontakte-lehtpolel. Konkursan tegeba Karjalan Rahvahiden sebruden kodi da “Periodika”-painišt Karjalan rahvahaližen da redionaližen politikan ministerstvan tugel. Nece konkurs mülüb Venäman rahvahiden ühtmuden voden azjtegoiden serijaha.
Ühtneda “Ectes pärunod” -sädandkonkursaha voiba Karjalan eläjid: lapsed, nored da aigvoččed, a mugažo kogonaižed perehed. Sädandradod ottas sulakun 26. päivähasai. Radoiden temad oma erazvuiččed (sugupol’viden sido, mehen südäinmir, kožmuz londusenke i m. e.), no nene kaik om sidotud runoiden tradicijaha.
— Om ani tärged muštta, miše ičeze rados tariž kävutada vaiše karjalan runoid i ei sa kävutada “Kalevala”-eposan runoid. Kaik radod pidab tehta ičenaižesti, päpakičusen om radon unikaližuz, tedotadas Karjalan Rahvahiden sebruden kodin VKontakte-lehtpolel.
Kaiken om koume nominacijad: “Karjalan runoiden kojaduz”, “Pärunon avadim” da “Aigan sol’m”. Ühtnikat voiba tehta pirdatusid, fotokuvid, videorolikoid, tehmusid, prezentacijoid, kanzprojektoid, a mugažo kirjutada muzikad vai kirjutesid.
Miše ühtneda konkursaha, tariž ezmäi täutta küzundleht. Vaumhed radod pidab oigeta elektronižele počtale, kirjeižen temaks kirjutada “Ectes pärunod” -konkurs”.
Sädandkonkursan ühthevedod tehtas kezakun 11. päivähasai. Vägestajad saba diplomad da muštlahjad, a toižile ühtnikoile anttas sertifikatad.
Tarktembad tedod “Ectes pärunod” -sädandkonkursas voib lugeda sen oficialižes azjbumagas.
Uzištoid neciš temas voib lugeda mugažo karjalaks da suomeks.
Tarkištele "Oma Median" Telegram-kanalad!
