Karjalas videnden kerdan mäneb “Puškinskaja-kartan nedal’”
Karjalas 18.–24. semendkud videnden kerdan mäneb “Puškinskaja-kartan nedal’” -akcii, siš tedotab Karjalan Valdkundan kul’turministerstvan press-služb. Mugoine akcii tehtas jo videnden kerdan, i täl vodel regionan eläjid da adivoid varastab enamba 80 azjtegod Karjalan erazvuiččiš kul’turorganizacijoiš. “Puškinskaja-kartan nedal’” tugedab “Pereh” -valdkundališt projektad, mitte ozutab Karjalan kul’turan ičeladuižut da äipoližut.
Puškinskaja-kartan päidei om tehta kul’turišt joudajad aigad popul’arižembaks noriden keskes. “Puškinskaja-kartan nedal’” om sur’ akcii 14–22-voččiden ristituiden täht, sen abul norile om kebnemb čukloutas Karjalan kul’turižehe eloho. Akcijan tomotai da aktivine tugedai om Karjalan Valdkundan pämez’ Artur Parfenčikov.
— Nedalin aigan tehtas ekskursijoid, interaktivižid urokoid, mastar’-klassoid, lekcijoid, spektaklid, koncertoid, fil’moiden ozutandoid da kul’turižid i tedotelendprogrammoid. Azjtegod vaumištadas kut Petroskoiš, muga Karjalan toižiš-ki lidnoiš i küliš, tedotadas ministerstvan press-službas.
Akcijan partn’oroiden keskes oma Karjalan taidehmuzei i rahvahaline muzei, Muzikaline teatr, Rahvahaline kirjišt, Tätüteatr, Filarmonii, Rahvahan sädandan i kul’turiniciativoiden keskuz da äi toižid.
Om tärged muštta, miše vodelpäi 2026 “Puškinskaja-kart”-programman holitai om VTB-bank. Puškinskaja-kartan kävutajile tariž udes registriruida nece kart VTB-bankas, miše sada ližad.
Uzištoid neciš temas voib lugeda mugažo karjalaks da suomeks.
Tarkištele "Oma Median" MAX-kanalad!
