Karjalas udištadas XIX voz’sadan pühäkodi
Änižröunan Šoutjärv’-küläs udištadas Matfei-apostolan kivipühäkodi, mitte oli saudud vodel 1837, tedotab Petroskoin i Karjalan jeparhijan press-služb.
Nece pühäkodi XX voz’sadan keskes tehtihe klubaks, a möhemba pühäkodin sauvotuz seižui unohtadud. Aigan sirttes pühäkodin katuz kadoi, seinäd hudrištuiba, a möhäine ližasauvotuz, mitte oli letud kluban tarbhuziden täht, mureni.
Muloi pühäkodin sauvotusele anttihe kul’turjäl’gestusen objektan status, se pättihe udištada. Necen voden redukus sauvotuz oficialižešti tehtihe udes pühäkodikš.
— Om tehtud ezmäižed haškud sihe, miše udessündutada Karjalale arvokahan vahnan pühäkodin. 17. redukud oli heittud möhäine ližasauvotuz, mitte letihe Sovetskijan Sojuzan aigan, — se värišti pühäkodin edelišt irdnägod. Kaik radod tegi “VAD”-sauvondorganizacii, sanutas Petroskoin i Karjalan jeparhijan press-služban tedotuses.
Nügüd’ keratas rahoid pühäkodin udištusehe. Petroskoin i Karjalan mitropolit Konstantin pani ijerejad Georgii Ignatovad vastusenpidäjaks kaikiš udištuzradoiš.
