Karjalas tehtud tavaroil nügüd’ om ičeze erišt Internet-laukoiš
Karjalas tehtud tavarad voib ostta Internet-laukoiš-ki. Nügüd’ tehta se “Ozon”-Internet-laukas voib völ kebnemba. Tavarad keratihe ühthe “Tehtud Karjalas” -katalogaha.
— Katalog andab biznesmehile voimusen tehta muga, miše tavarad oliži homaitud pigemba, da sen abul ližata niiden möndad, sanutihe “Karjalan Sanomat” -toimištole Karjalan tegeližuden da möndan ministerstvas.
Internet-laukas om ezitadud möndale Karjalas vaumištadud painatosid da marjkeitosid. Paiči sömäd katalogas om kosmetikad, erazvuiččid aksessuaroid da tavaroid lapsile. Nügüd’ lugetišes om enamba tuhad tavarad.
— Tavaroiden lugetišed kaiken aigan täuttas uzil tavaroil. Sihe voib putta mitte taht Karjalas tehtud tavar. Sen täht, miše ližata tavar lugetišhe, pidab oigeta pakičuz Karjalan tegeližuden da möndan ministerstvan elektronižele počtale, sanutihe “Karjalan Sanomat” -toimištole ministerstvas.
“Ozon” ei ole üksjäine mugoine tetab da sur’ Venäman Internet-lauk. Surembiden laukoiden keskes mugažo oma “Megamarket” da “Wildberries”. Karjalas tehtud tavarad voib löuta sigä-ki. No niiš ei ole erižid lugetišid.
— “Tehtud Karjalas” -katalog pidaiži säta “Wildberries”-laukan täht. Se tegeb sijaližid tavaroid tetabambikš, sanub Svetlana Žuravl’ova, kudamb vaumištab ičeze käzil šokolad- da sagudtr’ufelid Petroskoiš.
Uzištoid neciš temas voib lugeda mugažo karjalaks da suomeks.
