Karjalas rubieu ruadamah 80 liäkärii Zemskii doktor -programman mugah
Karjalan programmua ”Zemskii doktor” todevutetah vuvves 2012 algajen, jälgimäzet kuuzi vuottu programmua piettih kanzallizen Tervehyönhoido-projektan varoil. Programmah yhtyi 438 meedikkualal ruadajua.
Programman pidoloih joga vuottu ližätäh varua, vuvvennu 2025 niilöih on annettu 90,5 miljounua rubl’ua.
Kylis, pos’olkois da pienis linnois, kudamis on vähembä 50 tuhattu eläjiä, olijoih meedikkulaitoksih ruadoh tulduu ruadajat — piirin keskuksen bol’ničoin da ambulatourieloin liäkärit, enziavun feršalit, feršalipunktoin feršalit, akušeerat, voimattomien hoidajat — suajat kannatusližävöt. Palkoin suurus rippuu ruadajan ruadotilas da eländykohtan kategouries: meedikkupalvelijoile — 500 tuhattu rubl’ua da enämbi, liäkärilöile — 2 miljounah rubl’ua suate.
Vuvves 2023 federuallizeh programmah ”Zemskii doktor” yhtyttih miärävön mugah opastunnuot. Kahtes vuvves meedikkulaitoksih ruadoh tuli 12 hengie, kuduat loppiettih opastundan miärävön mugah. Vuvvennu 2024 Zemskii doktor-programman mugah Karjalas ruavon on suannuh 80 hengie: 58 liäkärii da 22 voimattomien hoidajua.
Tazavallan varoil meedikkualan ruadajile annetah ližiä kannatustu. Hyö suajah yksikerdazen makson, heile järilleh maksetah vuogrueländypaikas da sen palvelus maksetut den’gat, hyö suajah lunnastus keski- da yliopistolois opastundas. Nämmis varois maksetahgi opastusden’gat miärävöl opastujile.
Karjalan tazavallan piämiehen Artur Parfenčikovan käskyn mugah meedikkualan ruadajile ostetah palvelufatierat. Vuozien 2018—2024 aigah on ostettu 164 mostu fatierua.
Vuvves 2025 Tervehyönhoido-projektan loppiettuu programmu ”Zemskii doktor” kuuluu uudeh kanzallizeh Pitky da aktiivine elaigu -projektah.
Aihies voit lugie suomekse da vepsäkse.
