Karjalas rodieu uuzi turistutie
Karjalas luajitah uuzi turistutie A zori zdes’ tihije -filman mugah. Karjalan tazavallan piämies Artur Parfenčikov pidäy sidä tärgienny omažuksennu. Uuzi turistutie luajitah olemas olijan Rakkahus da kyyhköit -filman mugah luajitun turistutien peräh.
— On idejua luadie art-kohtat, kuduat ruvetah kuvuamah Karjalan kinematografan nevvostovallanaigastu histouriedu. Net ollah kuulužat kinot, sanommo ”Rakkahus da kyyhköit”. Se turistutie rodieu ainos vai kyzyttävin. On olemas projektu A zori zdes’ tihije -filman mugah. Se on meijän tärgei omažus, kerdou Parfenčikovan sanoi TASS-lehtistökeskus.
Boris Vasiljevan A zori zdes’ tihije -tarinu kerdou viijen nuoren tytön urhotevos da Stanislav Rostotskin filmu sen mugah on luajittu vuvvennu 1972. Filmua kuvattih Ruskealan kivikön rinnal Tohmajovel da Priäžän piirin Siämärven rannal.
