Karjalas on algavunnuh tulikiirehaigu
Tulipaloaijan aloh Karjalan mečis on vihjattu kuuzi tulipaluo, kudamien pinduala on 8,24 gektuarua. Mennyt vuon kezäkuun 20.päiväh suate oli vihjattu 46 meččytulipaluo 91, 22 gektuaral.
— Belaja Gora -kylän lähevil 16. kezäkuudu tulipalomiehet sammutettih tuli 0,3 gektuaral suurel alovehel, ilmoittau Karjalan tazavallan luonnonrikkahuksien da ekolougien ministerstvu VK-sivul.
Mennyöh vuodeh verraten tulipaloloin lugu on kaheksua kerdua pienembi, niilöin pinduala on 11 kerdua pienembi.
Tiedoloin mugah enimät tulipalot tazavallas sytyttih tulipaloturvalližuon siändölöin rikkomizen periä. Karjalan tazavallan luonnonrikkahuksien da ekolougien ministerstvu mustoittau, ku luonnonhelmas huogavujes pidäy olla varavozeh da vagavah, ku mečäs ei syttys tulipaluo.
Tulipaloloin sammuttamizen yhtehine pluanu Karjalas vuvvekse 2025 on hyväksytty vie sulakuun aigah. Tulipalomiehien da -laittehiston joukkoveheh kuuluu 2, 5 tuhattu spetsialistua da lähes 6 tuhattu palua tehnikkiä da laittehistuo.
Oraskuun allus tazavallas tarkembah da vagavembah vardoijah meččii. Ezmäzekse silmäl ollah tulipalovarattavat meččymuat da net alovehet, kudamien rinnal ollah muatalovuspellot, puusto- da kezämökkimuat.
Karjalan tazavallan luonnonrikkahuksien da ekolougien ministerstvas mulloi sygyzyl pandih merkile, ku viijes vuvves tulipalon keskimiäräine pinduala Karjalas pieneni 21 kerdah — 28, 5 gektuaras 1,3 gektuarah suate. Samal aigua tazavallas enimite — 60 tulipaluo (54 %) — tuli syttyy ristikanzan periä. Tuleniškus syttyi 35 tulipaluo, sähköliinien tulikybenehis — 9 tulipaluo.
Ilmoittua meččytulipaloh nähte voibi telefonah +7 (8142) 55-55-80.
