Karjalas mäneb “Muzejiden ö” -akcii
15.–18. semendkud Karjalan erazvuiččiden rajonoiden da ümbruzkundoiden muzejad taričeba ičeze kävujile melentartuižid kul’turprogrammoid, miš tedotab Karjalan kul’turministerstvan press-služb. Täl vodel “Muzejiden ö” -Ühthižvenälaine akcii om omištadud Venäman rahvahiden ühtmuden vodele.
Ičeze kävujid varastadas kümnes Karjalan muzejas, kus ristituil linneb voimuz nägištada harvinaižid eksponatoid da čukloutas erazvuiččiden aigoiden il’mištoho. Kaikutte muzei vaumišti programman, miččehe mülüba ozutelusiden kävund, tematižed ekskursijad, lekcijad, mastar’-klassad da interaktivižed vändod.
Vepsläižen kul’turan navedijoiden täht om tehtud eriline programm Šoutjärven vepsläižes etnografižes muzejas. Sigä “Muzejiden ö” mäneb 17. semendkud 17:00 časuspäi 22:00 časuhusai.
— Meiden programm om unikaline da ani melentartuine, ičeze il’mištonke. Kucum Šoutjärven muzejaha kaikid tahtnikoid! Toivotam, miše niken ei tusttu, sanui “Oma Media” -portalale Šoutjärven vepsläižen etnografižen muzejan pämez’ Natalja Anhimova.
15. semendkud akcii mäneb Pitkäranta-, Medvežjegorsk-, Kem’- da Segeža-lidnoiden muzejiš. 16. semendkud kävuijd varastadas Kostomukšas, Pudožas da Belomorskas. 17. semendkud Šoutjärven muzejan ližaks programm vaumištadas Olonec-lidnan rahvahaližes karjalaižiden-livvikoiden muzejas, a mugažo Kondopogan röunan muzejas — sigä sil-žo aigal praznuitas “Kivač”-kaičuztahon 95-vottušt jubilejad. 18. semendkud “Muzejiden ö” -akcii lopiše Sortavala-lidnas.
Akcijan aigan päzund muzejihe om maksutoi. Programmad lapsiden da perehiden täht om tehtud 6-voččile da vanhembile ristituile. Noril om voimuz kävuda muzejihe Puškinskaja-kartan abul. Ližatedoid voib löuta muzejiden oficialižil internet-lehtpolil.
16. semendkud mugažo mäneb “Läheližed”-online-akcii, mitte tehtas ühtes toižiden municipaližiden muzejidenke.
Uzištoid neciš temas voib lugeda mugažo karjalaks da suomeks.
Tarkištele "Oma Median" MAX-kanalad!
