Karjalas korgevimat ballat sai 33 školanloppijua
Ven’an školis loppiettihes tutkindot. Tazavallas korgevimat ballat tutkindolois on suannuh 33 nuordu.
Karjalan tazavallan piämies Artur Parfenčikov andoi kiitändykirjazet niilöile opastajile, kudamien opastujat suadih korgevimat ballat. Opastajat ruatah Lomonosovan, 30. da 17. gimnaazielois, Deržavinan da Yliopiston litseilois, Petrovskois dvorčas, Petroskoin školis n:ot 27 da 46 da Lahdenpohjan školas.
— Teijän opastujat ainos roitah teijän kel da ku roinnou jygielöi tilandehii, hyö tullah abuh. Pidäy sih uskuo, sih nähte panna malittuu, sendäh ku sih myö kaikin pyrgevymmö, sanoi opastajien kel vastavujes Karjalan piämies.
Petroskois kunnivoittih niilöi školan loppijoi, kuduat suadih hyväs opastundas kuldazet da hobjazet medalit. Yliopistoloih pyrgevyjes nuoril rodieu helpotustu — ližävöidy ballua. Petroskoilazet nuoret suadih 150 medalii — 101 kuldastu medalii da 51 hobjastu. Eräs vuitti nuordu vie vuottau tutkindoloin tuloksii. Heis medalit voijah suaja vie puolisadua hengie.
Yhty Oman Median kanualah MAX:as!
