Karjalas kazvab professionaližiden tundištoitajiden lugumär
Karjalas 2025. voden aigan attestacijas läbi päzui 129 mest. Ičeze radon jatkmižen täht kaikuččele tundištoitajale pidab päzuda kodvas läbi. Sen voden redukus Karjalan tundištoitajiden da tundištoitajiden-kändajiden lugetišhe putui 19 ut specialistad. Nügüd’ hö kaik oma Ühthižes federaližes lugetišes.
1. keväz’kun päiväspäi tundištoitajad ei voigoi tehta ičeze radod ilma oficialižeta attestacijata. Sen om tärged hašk sen täht, miše regionas sünduiži tundištoitajiden professionaline sebr.
— Nügüd’ Karjalan Valdkundas om 306 tundištoitajad, kudambiden kvalifikacii sättub ühthižihe standartoihe. Sen taguiči regionan adivod saba korgedladuižembid holitusid tundištoitajilpäi, a Karjalan turizm kehitoitase, tedotadas Karjalan Valdkundan Ekonomižen kehitoitusen ministerstvan internet-lehtpolel.
Attestacijaha mülüba test da praktikaline pala. Ližatedod siš ekzamenas voib löuta ministerstvan internet-lehtpolel vai sada telefonadme: 8 (8142) 55-98-01 (liž. 505).
Niiden täht, ked vaiše zavodiba rata tundištoitajan professijas, attestacii om tehnus tarbhaižeks standartaks. Se om ani tärged, sikš ku tundištoitai jätab turistoil ezmäižen jäl’gen regionaspäi. Ku specialistan päs faktad da tedod segoituba, ku hän ei mahta rata ristituidenke da ei teda tahod — nece kaik travib regionan mel’kuvad.
Tarkištele "Oma Median" Telegram-kanalad!
