Karjalas elättilöi da linduloi lugietah jälgilöi myöte
Karjalan tazavallan 15. pakkaskuudu—15. kevätkuudu pietäh jogavuodehine talvehine elättilöin da linduloin liikundutarkastus. Karjalas sen tarkastuksen mugah lugietah elättilöin 12 luaduu da linduloin 4 lajii. Jälgilöi myöte lugietah oravii, hukkii, meččypoččiloi, pordimoloi, jänölöi, niädöi, reboloi, hirvilöi, huahmoloi, pedroi, ilveksii, horkii, sego meččoloi, tedrilöi, pyylöi da meččykanoi.
Tarkastus andau mahton arvostua mečästysresursat da suaduloin tiedoloin mugah miärätä mečästysrajamiärät.
— Tarkastustu luajitah ei kogo piirii myöte, vai joga mečästysalovehen kohtah. Jogahizes pidäy luadie 7 tiedy, kudamine yhtehine piduhus on 100 kilometrii. Pienis mečästysalovehis, kudamis on vaigei täyttiä normatiivat, tielöin lugu on pienendetty 4 suate, tielöin yhtehine piduhus — 80 kilometrih suate. Tarkastustu luadijes voibi käyttiä motorregylöi da suksii, ilmoittau Karjalan luonnonvaroin da ekolougien ministerstvu omassah tiedottehes.
Mečästysinspektorat yhtytäh talvehizeh tarkastukseh, ku elättilöin da linduloin lugu ei olis ylen suuri da niidy ei olis enämbi tarvittavua. Mennyt vuon muga oli luajittu Anuksen, Pitkänrannan, Puudogan da Onieganrannikon piirilöis. Vuvvennu 2026 mostu ruaduo jatketah. Karjalan luonnonvaroin da ekolougien ministerstvan ruadajat lähtietäh tarkastukseh yhtes mečästysinpektoroin kel Priäžän, Onieganrannikon da Anuksen piirilöih.
Jogavuodehizen talvehizen elättilöin da linduloin liikundutarkastuksen tulokset annetah Karjalan luonnonvaroin da ekolougien ministerstvah sähkömuvvos kevätkuun 25. päiväh suate.
Yhty Oman Median kanualah Telegramas!
