Karjalas 172 tundištoitajad jo päzui kodvas läbi vodel 2025

1. keväz’kud tuli valdaha sänd, miččen mödhe kaikile tundištoitajile-kändajile pidab päzuda specialižen attestacijan läbi. Ilma attestacijata hö ei voigoi tehta ičeze radod. Kuva: freepik.com

Tuli valdaha sänd, mitte koskeb tundištoitajiden attestacijad. Ičeze radon jatkmižen täht kaikuččele tundištoitajale pidab päzuda kodvas läbi. Azj om siš, miše se professii om nügüd’ kontroliruidas oficialižešti. Attestiruidud specialistad putuba Ühthižehe federaližehe lugetišhe. Nece tehtas sen täht, miše professijas ei oliži “verhid” ristituid.

— 2025. voden vilukuspäi elokuhusai “Gosuslugi”-portalan kal’t oli oigetud 182 pa-kičust, i 172 niišpäi sai pozitivine vastuz. Vodel 2024 mugoižid vastusid oli vähemb: kogonaižen voden aigan oli oigetud 101 pakičust, miččišpäi pozitivine vastuz sai 77, tedotadas Karjalan Valdkundan Ekonomižen kehitoitusen ministerstvan lehtpolel.

Attestacijaha mülüba test da praktikaline pala. Tarkad tedod siš ekzamenas voib löuta ministerstvan internet-lehtpolel.

Niiden täht, ked vaiše zavodiba rata tundištoitajan professijas, attestacii om tehnus tarbhaižeks standartaks. Se om ani tärged, sikš ku tundištoitai jätab turistoil ezmäižen jäl’gen regionaspäi. Ku specialistan päs faktad da tedod segoituba, ku hän ei mahta rata ristituidenke da ei teda tahod – nece kaik travib regionan mel’kuvad.

Tundištoitajiden-kändajiden attestacijan taguiči Venäman turizm tegese parembaks, korgedladuižeks. Voden 2025 sändod tegeba professionaližid standartoid korktembikš, a specialistoiden registracijad – kebnembaks da heredambaks.

Uzišt neciš temas voib lugeda mugažo karjalaks.