Karjalankielizet ystäväzet Priäžän piirikeskukses
Priäžän Elämä-keskukses pietäh karjalan kielen kursiloi da vie erikseh paginkluubua. Pari kymmeniesty nastu kävyy niilöih.
Kursiloi pietäh vuvves 2020 algajen, vedäjänny on Jelena Ruppijeva. Opastujil oli himo kuččuo pos’olkan rahvastu da ozuttua mitahto ozutus karjalan kielel ičeväil. Vallittih Valentina Kondratjevan Ozan tiešuarat -kogomus, kus oldih painetut lyhyččäizet kummallizet kerdomukset. Ystäväzet-ozaspäi otettih nelli kerdomustu: “Čuajunmuagari”, “Kezoinkylbii”, “Varen’n’an keittäi” da “Kummankuvai”. Net yhtes šeikuittih ozuttamol pandavakse da kevätkuus algajen ruvettih harjaittamah rouliloi. Kai lavastukset luajittih omil käzil, vuadimattomat da ozuttamol liikkujat.
Priäžäläzet Tatjana Prokopjeva, Antonina Ruhtojeva, Tatjana Korz’uk, Raisa Ivanova tietäh karjalua lapsestusaijas, ga juuri kielikursat autettih heidy suaha kirjutandu-da lugemisnerot. Spektaklih yhtymine heile kaikile oli ezmäzii kogemuksii. Pidi panna mustoh pitkähköt tekstat da ozuttua omua kieli — da artistuneruo julgizesti.
— Minä rodivuin Kinnermäl. Priäžäs elän, Petroskoil ruan. En uskonuh ezmäi omah iččeh, ylen jygei oli spruaviekseh, sanou Tatjana Prokopjeva, Kummankuvai-kerdomuksen Vera-roulin ozuttai.
Pošti čuasun kestäjän spektaklin ohjuajakse tuli keskuksen ruadai Natalja Gladilina, kudamale kai nelli tekstua tuli kiändiä ven’akse. Sanakse, net kiännökset hyvin pättih mindäh sendäh entokul’tuurine keskus hommai kiännöslaittehet da ozutuksen ven’ankielisty kiännösty suadih kuunnelta kuulokkehis karjalua elendämättömät kaččojat, kudamii oli täyzi zualu.
Dielo kaččojien mieldy myöte ozavui. Karjalua paistih čomasti da lujah, kerrotut kummat roittih hyvin ellendetyt da vesselät. 0+
