Karjalankielizet runot enzi kerdua puututtih Sankt-Peterburgas piettäväh kilbah
Vladimir Majakovskin kirjaston ulgomuankirjalližuon ozasto da Lugii Peterburgu: kul’tuurizet koodat -literatuuruprojektan valmistandukomitiettu ilmoitettih runoloin kiännöksien kilvan. Sih voijah yhtyö alguajat runoilijat, kiändäjät, filoulogat, yliopastujat kaikis mualois da kaikin, ket suvaijah literatuurua da opastutah vierahii kielii.
— Olemmo varmat, ku runotekstan muokkuamine, sanan tarkan merkičyksen ellendämine da toizes kieles vastuavan sanan eččimine andau mahton syvendyö vierahah kul’tuurah, parembi ellendiä sidä, sellittiä toizien kanzoin kul’tuurizet koodat da roita lähembä toine tostu, on sanottu Vladimir Majakovskin kirjaston saital kilbah nähte.
Kilbuniekoil pidäy kiändiä yksi libo enämbi runuo, kudamii vie ei painettu ven’akse. Tänä vuon kilvan luadijat valmistettih tekstat 21 kielel, kudamien luvus ollah ažerbaidžanskoi, anglien, arabien, valgoven’an, bengal’skoi, ivrit, indonezijan, ispanien, kitain, kirgizoin, mongoloin, portugalien, serboin, farsi, frantsien, dolganoin, ketoin, nentsoin, nivhoin, hantin da karjalan kielet. Kiännettävien tekstoin joukos on ulgomualoin da Ven’an vähembistökanzoin runoniekoin tevostu.
Enzi kerdua kilbah on otettu karjalankielizen runoniekan tevos. Runon kirjuttai on kiändäi da lehtimies Vasilii Ivanov, kudai runoilou peittonimel Vas’a Veikki. Anuksen piirin On´kulan kyläh rodivunnuh runoilii hyväl mielel andoi oman runon kiännettäväkse da uskaldi erinomazen mustolahjan parahan kiännöksen kirjuttajale.
Kilvan arvostajien joukkoh kuulutah meigäläzet kielentiedäjät: karjalan kielen opastai Tatjana Baranova, literatuuran tutkii Natalja Čikina da lehtimies Aleksandr Jeremejev.
— Ottua tämän vuvven kilbah karjalankieline runo kiännettäväkse, se oli Majakovskin kirjaston ulgomuanliteratuuran ozaston ruadajien kehoitus. Minun mieles se ozuttau, ku karjalan kieli eläy, on literatuurutevostu karjalan kielel, on karjalan kielel kirjuttajua, sanoi Oma Mediale Al’ona Säntti, kilvan koordinuatorannu Karjalas, TV:n toimittai, opastai.
Kilburuadoloi otetah vastah tämän vuvven kevätkuun 22. päiväs algajen kylmykuun 30. päiväh suate sähkömuvvos.
Kilvan tulokset ilmoitetah Majakovskin kirjastos 21. kevätkuudu 2026 offline da online.
Aihies voit lugie suomekse da ven'akse.
