Karjalan šuurin nuorisoforumi lopetti oman ruavon
Nuoriso-, volont’ori-, kanšalais- ta nuorisojärještöjen yli 150 etuštajua vietettih nellä aktiivistä opaššušpäivyä Bereg-forumissa. Še piettih Urozero-lepopaikalla. Karjalan šuurimman nuorisoforumin teemana oli Karjalan tašavallan viehättävyön kehityš käyttyän luovie keinoja. Forumin ošallistujat vaštauvuttih Karjalan kanšalaisjärještöjen johtajien ta Luovien tekijien liiton etuštajien kera ta šuatih vertuamattoman kallehie tietoja, kuin vaikuttua oman paikan ulkonäköh jo nyt.
— Jokahini forumin järještäjistä anto šillä oman šielun palasen. Myö tahomma, jotta forumi jäis ošallistujien muistih. Tänä vuotena meilä oli mahollisuš pityä granttikilpailu ta antua kannatušta voittajilla, šano forumin järještäjä Nikita Vinogradov.
Forumi on ihana paikka, jotta tuttavuštuo projektitoimintah ta šuaha enemmän tietuo, kuin kirjuttua projektija ta šuaha kannatušta.
— Mie tahon opaštuo kirjuttua projektija, jotta šuaha grantin Troičan pruasniekan pitämisekši Rukajärven kyläššä. Himottais, jotta Karjalan rikaš ta ainutluatuni istorija ta kulttuuri šais enemmän huomijuo ta šäilyis. Löysin forumista innoššušta ta uušien ajatukšien lähtehie, šano forumin ošallistuja Valeria Puršel’.
Eryähän forumin ošallistujat šuatih granttikannatuš heti forumissa. Voittajien kešen on Karjalan etuštajien kolme projektie: Pimeyveššä-filmin valmistamini, Tanššijaiset mečäššä-karjalaisen kulttuurin festivali ta Karjalan šuojelualovehien kuupka-nuorisoprojekti, kumpasen tarkotukšena on šuojelualovehien šäilyttämini.
