Karjalan urhot: uuzi programmu on pandu rattahile
Petroskois piettih paginua erillizen voinuoperatsien veteruanoin da yhtynyzien kannatukseh da opastukseh nähte. Ruadoistundoh yhtyi Karjalan tazavallan senuattoru, Federatsien nevvoston puolistus- da turvalližuskomitietan varapiämies Vladimir Čižov.
— Tänäpäi paginal olijat kyzymykset ei liitytä vaigu erillizen voinuoperatsien nygyaigazeh kaudeh, net roitah tärgiet sen loppiettuugi. Niilöi sellittämäh jovvutah kui alovehellizet, mugai paikkukundien valdivovallat. Se tarviččou tärgielöin da aigukohtazien piätöksien valmistamistu, sih ruadoh yhtyttih Karjalan laitokset da virrastot. Federatsien nevvoston tazol myö sežo kiinitämmö sih suurdu huomivuo. Meil on tärgei oigei yhtevys alovehien kel, ku voizimmo sellittiä kai ruavot, midä tulou ruadua, sanoi Vladimir Čižov Karjalan piämiehen lehtistöpalvelule.
Karjalan urhot -alovehelline programmu on prezidentan Urholoin aigu -projektan jatkonnu. Tämän vuvven kevätkuus sen pani alguh Karjalan tazavallan piämies Artur Parfenčikov.
Karjalan urhot -programmah opastumah piäzi erillizen voinuoperatsien 30 veteruanua. Vie 15 meigälästy, kuduat nygöi ollah erillizes voinuoperatsies, piästäh opastumah sluužban loppiettuu. Programmah yhtynyzil pidi piästä valličukses läbi, toizien ruadoloin keskes heil pidi kirjuttua esse, täyttiä testu da pidia pagin ekspertoin kel.
Opastundua pietäh Talovuon da valdivopalvelun Ven’an akadeemien filiualan tilois. Heinykuun 15. päivänny alovehellizen programman todevuttamizes vastuaju tazavallan yhtehine nevvosto hyväksyi Karjalan urhot -programmah yhtynyzien loppuluvettelu. Opastundu algavuu 8. syvyskuudu.
