“Karjalan tikan” johtai da ainavo ruadai Mihail Smirnov rubei ruadamah omah biznesprojektah nähte vuvvennu 2024 keviäl. Häi opastui sih neroh ičeväil, kirjutti biznespluanua. Varoi omah biznessah niškoi mies sai Karjalan tazavallan Sotsiualupuolistuksen keskuksespäi. Sotsiuallizen kontraktan hindu oli 360 tuhattu rubl’ua.
Valdivon annettuloih abuden’goih Mihail Smirnov osti jyrzinkonehen noumerallizen ohjavuksenke, tiedokonehen, eri käziruadobrujat da fanierua.
Mihail Smirnov loppi Avtoliikkehen tehnikuman, erähän aijan ruadoi šouferinnu.
— Mustan, vahnembat lahjoitettih minule nevvostoliitonaigazen puusepänkogomuksen, sendäh minä jo lapsusaijas maltan kuda-midä ruadua puunke, rubei sanelemah omii perusneroloi Mihail Smirnov. — Konzu opastuin školas, meil oldih tovellizet käziruavon urokat, briččuloih niškoi oli ruadopaja, kus opastuimmo ruadamah kaikkie.
Nygöi jyrzinkoneh kebjendäy ruavon, ga pidäy maltua kirjuttua ohjavusprogrammoi tiedokonehel joga luajilmukseh niškoi, sit valmistu luajilmustu vie pidäy silendiä da kruassie.
Neroniekan ruadopajas jo otetah omii tiluajii valmehet luajilmukset, kudamis pietäh salfietkoi da lampat, nygöi valmistumas on seinäle pandavu čomendus.
Tuliel aigua Mihail kaččou pidiä puusepän ruadopajoi lapsih niškoi.