Karjalan tietomiehih šuau tutuštuo Petroskoin rantakavulla
Karjalan tietokeškukšen 75-vuotispäivällä omissettu näyttely avattih Petroskoissa rantakavun lähellä, Sovetskaja-aukivolla. Avajaisih tuli keškukšen ruatajie ta kaupunkilaisie. Seremonijašša esiinnyttih Karjalan tietokeškukšen johtaja Ol’ga Bahmet, Petroskoin kaupunkipiirin piämieš Vladimir L’ubarskii ta keškukšen tietomiehet.
– Nyt tietoala on lähistä monella ihmisellä: šuau lukie kirjoja ta käyttyä koissa šemmoista tekniikkua, min avulla voit luatie tietotukimukšie ta avaukšie. Meijän tietomiehien panoš on huomauttava, esimerkiksi, kallivopiirrokšilla oli myönnetty UNESCO:n statussi juuri tietomiehien ruavon anšijošta. Kiitän teitä ta onnittelen, šano Petroskoin kaupunkipiirin piämieš Vladimir L’ubarskii.
– Karjalan tietokeškukšen tietomiehet tutkitah niise Karjalalla tärkeitä kyšymykšie, kumpaset liitytäh ekologijah ta luontoh, ečitäh ta tutkitah kivien lajija, luajitah tutkimukšie sosialialalla, ratkaissah matematiikkakyšymykšie, koroššettih näyttelyn järještäjät.
Näyttelyššä on esillä yli 30 tutkijan valokuvua ta tietoja heijän tutkimukšista. Täštä näyttelyštä alettih tietokeškukšen juhlalliset toimenpivot. Tämän netälin šuovattana kaikkie halukkahie kučutah tietokeškukšeh tuttavuštumah tietomiehih, käymäh opašretkellä ta kuuntelomah luventoja.
