Karjalan tazavallan piämies avai uvven lapsienpäivykoin Petroskois
Uuzi lapsienpäivykodi on avattu Kl’učevaja-eländyalovehel. Jakor’ok-nimelline lapsienpäivykois on 280 sijua lapsile.
— Ymbäri päivykois on pedäjikkö, juuri moizii kohtii pidäy andua lapsile. Projektu oli erinomaine da jygei, ga yhtelläh todevui. Päivykodi avai omat veriät da minä hyvittelen lapsii, vahnembii, kazvattajii da linnalazii. Anna tiä ainos kuuluu lapsien vessel iäni, sanoi Karjalan piämies Artur Parfenčikov omassah lehtistöpalvelule.
Uuzi pävykodi vastuau kaikkii vuadimuksii, sit on 12 lapsien pertii, muuzikku- da sportuzualu, keitändyperti, metoudine, meedikku- da hoidokabinietat, erillizet pertit psihoulogale da paginterapeftale. Uvves rakendukses on videotarkastus, avtomuattine tulipalosignalizatsii, sit ollah tarvittavat laittehet niistielöih rahvahih niškoi.
Uvves päivykois otetah vastah 280 lastu, sit rodieu 60 uuttu ruadokohtua, roih ruadosija 28 kazvattajale.
Vuvves 2019 Petroskois on avattu yheksä lapsienpäivykodii, kogo tazavallas on avattu viizitostu päivykodii. Kl’učevaja-eländyalovehen rahvas puaksuh kyzyttih sih linnan agjah päivykodii.
Uudeh päivykodih sulakuus 2025 sijoitetah Filippok-nimellizen lapsienpäivykoin kazvattiloi, kuni heijän päivykois pietäh perustehellistu remontua.
