Karjalan tazavaldu: kyzyttävät ammatit da ilmaine opastus
Vuvvennu 2025 ruavottomuspalvelun kannatuksel Karjalas 481 ristikanzua suadih ammatillizen opastuksen niilöil ruadoaloil, kudamile enimite tarvitah ruadajua. Varua sih ruadoh suadih tazavallan b’udžietas da kanzallizen Kadri-projektaspäi. Opastettulois 425 hengie jo löyttih ruadokohtat libo säilytettih ruadokohtu suavun ruadoneron korrendamizen jälles.
Opastuo voijah ruavottomat, eläkkehele šuorivujat, 35 vuottu nuorembat, naizet, kudamil on alaigästy lastu da erillizeh voinuoperatsieh yhtynyöt. Ruavottomil palvelu maksau järilleh varat, kuduat on käytetty meedikkutarkastukseh, sego matku- da eländymenot opastundan aigah.
Kaikis kyzyttävimät ammatit vuvvennu 2025 oldih hitsuaju, gruuzumašinoin da autobusoin šouferi, keittäi, magieloin syömizien valmistai, sähköazettai, IT-alan ruadai.
Opastuksen loppenuot jo ruatah tazavallan suurimis laitoksis — Linnan transportu-, Karelgaz-, KarelKommunEnergo -laitoksis, Arktika-ombelusfabrikal, tervehys- da sotsioalan laitoksis.
— Opastus on hyvä keino sellittiä korgeiluaduzien ruadajien vähyön da hyvän ruadokohtan ečon probliemu. Myö emmo muite vai anna ammattii, myö valmistammo spetsialistoi, kuduat varmah suajah ruadokohtat da kudamii vuotetah ruavonandajat. Tädä ruaduo jatkammo vuvvennu 2026, kerdou Karjalan ruavon da ruavottomuon haldivo sen varapiämiehen Jurii Borisovan sanoi.
Opastusprogrammoi vuozi vuottu rodieu ainos vai enämbi. Lähi aigua jo suau kirjuttuakseh opastundah trolleibusan ajajakse, ombelijakse da kaivondukonehen ohjuajakse.
Yhty Oman Median kanualah Telegramas!
