Karjalan suarnua suau kuulta internetas
Karjalan audiosuarnua karjalakse, vepsäkse da suomekse tänä vuon suau kuulta Ven’an kanzoin iänet -platformal. Projektua todevutetah Kul’tuurualguhpanoloin prezidentan fondan kannatuksel. Suarnoi vallites kiännyttih Karjalan tiedokeskuksen Kielen, literatuuran da histourien instituutan puoleh. Iänitettih suarnoi Karjalan kanzallizen teatran artistat Sandra Aniskina, Andrei Gorškov, Julija Kuikka da Ronja Kinnunen.
Ven’an kanzoin iänet -platformal kielet kuulutah nygyaigazes formuatas. Projektan tarkoituksennu on muamankielen vuoh kiännyttiä suarnu perehen elaigah, pujoittua suarnu nygözeh kul’tuurah da säilyttiä sugupolvien yhtevys.
— Olemmo sovinnuh projektan ruadojoukon kel, ku iänitetyt suarnat myö sijoitammo jälles VepKar-platforman Karjalan baltiekkumeren-suomelazien kielien audiokartale, sanoi Kielen, literatuuran da histourien instituutan piälikkö Irina Novak Karjalan tiedokeskuksen lehtistöpalvelule.
Ven’an kanzoin iänet -projektan todevuttajat kerrottih, ku projektan enzimäzel etuapal luajitah Ven’an suomelas-ugrilazien kanzoin — karjalazien, vepsäläzien, suomelazien, komi-perm’akoin, mordvan — iänisuarnoi. Joga suarnal rodieu kaksi versiedy — omal kielel da ven’akse kiännetty. Kaikkiedah rodieu 25 suarnua. Tuliel aigua kuulta net suarnat voibi Yandex:an iäniabuniekan Alisan avul.
Aihies voit lugie suomeksegi.
Yhty Oman Median kanualah MAX:as!
