Karjalas piäl 10 vuottu ruadai Projekt-laitos, kudai tässäh valmisti kivenhienonduslaittehistuo, algau uvven projektan. Sih nähte laitoksele pidäy uuzii muatiloi. Karjalan haldivon kannatuksel on suadu muapala laitoksen tiloin suurendamizekse. Sen pinduala on 73 tuhattu nelliömetrii da se on Kondupohjan piirin Jänišpuolen kyläs.
Kondupohjan piiris ruadomatkas olles Karjalan piämies tarkasti laitoksen ruadovoimii, tuttavui sen ruadoh.
Karjalas tänäpäi 80% kogo kivenhienonduslaittehiston miäräs valmistau Projekt-laitos. Sen laittehisto on tuttu KonStan-merkil. Meijän tazavallas luajittuloi stankoi myvväh muan toizile alovehile da Valgoven’ale.
— Laitoksel on suurdu kogemustu täl alal. Heijän laittehisto on kyzyttävy. Ku sidä rakkahal ostetah, kazvaugi tuotando, sanoi Karjalan piämies Artur Parfenčikov omale lehtistöpalvelule.
Karjalan piämies sanoin mugah, on ylen tärgei, ku myö emmo vai pilua kivie, ga hienondammo sidä, valmistammo sen muokkamizekse uuttu laittehistuo.
Projek-laitoksen piälikön Jurii Bulavkinan mugah tuliekse kačotah luadie gruuzunnostajua da poliiruittajua laittehistuo. Allus uudeh tuotandoh investoijah enämbi 50 miljounua rubl’ua. Paiči sidä pluanois on luadie laittehistuo puunjalostuslaitoksih nähte.