Karjalan runotust korktas arvostadihe Podporožjes
Podporožjen kul’turkeskuses Aleksandr T’utr’umovan nimel mäni sädandvastuz, kus ezmäižen kerdan ozutadihe ”Piterin karjalaine heng”-fil’m, miččen tegi tetab vepsläine kodi-istorijan tundii, lehtmez’ i kirjutai P’otr Vasiljev. Vastusele kuctihe vepsläst kirjutajad da runoilijad Oleg Mošnikovad Karjalaspäi. Podporožjen eläjad surel tahtol tundištihe hänen sädandradonke.
— Karjalan runotust korktas arvostadihe Podporožjes. Kundlijoile tuli mel’he minun runoid da starinoid. Ezmäižen kerdan olin Podporožjes. Lujas tuli mel’he lidn, sen randird, sijaline puišt. Olin Podporožjen keskuzkirjištos, toin tänna ”Kodima”-lehtesid da kirjoid, sanui Oleg Mošnikov.
Podporožjen agjan administracijan pämehen Aleksandr K’alinan abul runoilijale ozastui olda hänen sebranikan, vepsläižen literaturan klassikan Nikolai Abramovan kodiküläs — Ladvas.
— Kumarzimoi Nikolajale küläkaumištol. Jäl’ges hänen sizarenke Taisijanke olim heiden kodipertiš, jodes čajud minä lugin hänele runoid laps’aigas da lahjoičin hänele kirjoid, sanui Oleg.
