Karjalan piämies tarkasti Anukses piettävii kohendusruadoloi
Anuksen linnas kohendetah kul’tuurutaloidu da kinoteatrua. Ruadoloi pietäh federuallizen Kyläalovehien nygyaigaine nägö -projektan mugah. Kai ruavot tulou loppie vuvven loppuh suate.
Kul’tuurutaloidu da kinoteatrua allettih kohendua tänä keviän. Mollembat rakendukset ollah tärgiet anukselazih nähte.
Vuvvennu 1961 nostettu kul’tuurutaloi jo ammui vuadi kohendustu. Täkse aigua täl objektal on loppiettu riičindyruavot, on azetettu uuzi levo, luajittu lämmembäkse vuiškutilat, valmistettu lattien alustu. Objektu on valmis 65 %.
Vuvvennu 1978 luajittu kinoteatru sego nägeväh muuttuu. Nygöi luajitah levuo da lattieloi, azetetah tulet, ulgoseinii obšivoijah metalluplitkal, lujoitetah metallurungo.
— Kaikis suurin ruado on levon da ulgoseinien uvvistamine. Samal aigua rakenduksien sydämesgi piemmö ruadoloi. Ruammo gruafiekan mugah, pyzymmö hyväs vauhtis, sanoi Severnoje sijanije -laitoksen ruadai Aleksandr Rodionov Karjalan piämiehen lehtistöpalvelule.
Artur Parfenčikov kiitti Alavozen da Mägriän souhozoin ruadajii, heijän hyvyös tazavaldu sai mahton yhtyö federuallizeh programmah da lunnasti varua kul’tuurualan rakenduksien kohendamizeh. Sego souhozat pandih omua varua kohendusruadoloih.
— Kul’tuurutaloi da kinoteatru ollah ei vaigu rakendukset, net ollah keskukset, kuduat vietäh omah puoleh anukselazii. Ku ruadoloi pietäh federuallizen projektan mugah, on tärgei, ku net oldas luajittu kunnon luaduh da aigoinaijal vuvven 2025 kylmykuuh suate, sanoi Karjalan piämies.
Jälles kohendusruadoloi kul’tuurutaloi da kinoteatru roitah nygyaigazet, mugažat tilat anukselazien aijanvietokse.
Aihies voit lugie suomeksegi.
