Karjalan piämies: perehien kannattamine enziruavonnu
Ven’an prezidentan oigien liinien piettyy Karjalan piämies miäräi tärgevimät ruadotavoittehet meijän aloveheh nähte. Niilöin joukos lapsiperehien kannattamine, transportu- da energiiinfrastruktuuran kehittämine, meedikkuavun kebjieh suandu.
Talvikuun 19. päivänny Vuvven tulokset Vladimir Putinan kel -oigien liinien aigah Ven’an prezidentu vastai lehtimiehien da meijän muan eläjien kyzymyksih. Tämän vuvven pido oli pitkevin da kesti lähes 4,5 čuassuu. Artur Parfenčikov korosti, ku tazavaldu tävvelleh kannattau prezidentan miärättylöi tavoittehii perehien kannattamizekse. Jo nygöi Karjalas on omua abukeinuo lapsekkahih perehih nähte.
— Karjalas myö alalleh suurendammo lapsekkahien perehine kannatustu. Täs vuvves algajen maksammo 100 tuhattu rubl’ua opastujile nuorile muamoloile lapsen suaduu. Lähes 50 hengie suadih moizet maksot. Ga myö kačommo sen makson suurendamistu. Paiči sidä levendimmö tarkoituksien luvettelun, kunne voibi käyttiä net varat, kuduat muamo suau lapsen suaduu, kirjutti Artur Parfenčikov omassah VK-sivul.
Varat, kuduat suau muamo lapsen suaduu, voibi käyttiä muapalan ostamizeh, sego lapsien opastamizeh.
Paiči sidä Karjalas maksetah perehile kolmen da vie enämbän lapsen suandas, net varat voibi käyttiä eländytiloit ostamizeh libo rakendamizeh. Joga vuottu lapsekkahat perehet suajah korvuamizet školavehkehien ostamizeh. Nuoret muamat suajah Lahju vaste rodivunnuole -komplektat, heile turvatah maidotuottehet da parandusrohtot. Muamat, kudamil ollah pienet lapset, voijah suaja uuzi ammatti da perustua oma biznessu.
Lapsekkahien perehien kannatuksennu Karjalan piämiehen kehoítukses on luajittu uvvet valdivopalkindot — Karjalan muaman kunnivo-ordenu da Arvoruadolois lapsien kazvattamizes -medali. Palkindoloin vuoh arvostetah vahnembien ruaduo, kuduat kazvatetah enämbän kolmie lastu.
Aihies voit lugie suomeksegi.
Yhty Oman Median kanualah Telegramas!
