Karjalan piämies avai uvven autoazetuskohtan Petroskois
Petroskoin linnas Junapuustos raudutieazeman rinnal on avattu uuzi azetuskohtu ajonevvoloih nähte. Se on tärgei elementu raudutien rinnal olijan alovehen kunnostamizes da se luadiu linnalazien elaijan mugažembakse. Rahvas nygöi voijah jättiä omat ajonevvot hyväh, juuri sih niškoi luajittuh kohtah. Uudeh azetuskohtah suau jättiä 165 mašinua, on olemas omat paikat niistielöin ajonevvoloih niškoi.
— Rakendussobimus oli allekirjutettu vuvven 2024 lopus. PSK-Stroitel´-laitos keviäl da kezäl aktiivizesti pidi ruadoloi, sendäh azetuskohtu on luajittu vuottu enne uskaldettuu aigua, sanoi Karjalan tietalovuon da transportuministru Dmitrii Krilov Karjalan piämiehen lehtistöpalvelule.
Karjalan piämies Artur Parfenčikov kiitti PSK-Stroitel´-laitoksen ruadajii hyväs da enne sovittuu aigua luajitus ruavos.
— Myö yhtistimmö raudutien- da autoazeman yhteh transportusolmeh. Linnan haldivon kel pagizemmo, kui ielleh kunnostua dorogua azemale Gogol´an pihan da Perevalkan puoles, sanoi Karjalan piämies.
PSK-Stroitel´ pidi suurii ruadoloi objektal: on luajittu muaruavot, uudeh luaduh on luajittu elektroverkot da vihmukanalizatsii.
Junapuuston kunnostamizen arvostetah jallaigi astujat. Projektan mugah on luajittu tulipaččahat, leviet trotuarat da istutettu 50 puudu.
Aihies voit lugie suomeksegi.
